بختها مايل

كلمه ” بخت ” كلمه فارسيه معناها  الحظ والنصيب ..

بنقول لمين  فى مصر او عن مين ……..” انت بختك مايل ” ويكون قصدنا ان حظها وحش او نصيبها مش ولابد ..الكلمه دى دايما نقولها ونسمعها عن اى بنت عانس او اى ست مطلقه او جوزها هجرها او حتى مات ….كل الحياة بنختزلها فى راجل هو اللى يحدد مين بختها عدل ومين بختها مايل ….طيب مش هى دى المشكله …المشكله ان البنت او الست هى اللى دايما مسؤوله عن بختها وهى السبب فيه …يعنى بدل ما المجتمع يساندها  او حتى يسيبها فى حالها …لا بيحسسها ان هى لازم تظبط اوضاعها وبسرعه …قبل ما الزمن يفوت وتعيش كده بدون ضل راجل …والسؤال الاهم هل ياترى كل اللى اتجوزوا …حققوا الانجاز الرهيب بجوازهم ..عدلوا المايله يعنى …ولا لانهم قاعدين تحت الضل محدش واخد باله منهم …وياترى ليه الشاب العانس ..:”وعلى فكرة الكلمه دى تطلق على البنت وعلى الشاب يعنى فى بنت عانس وفى شاب عانس …بس عمرنا ما بنقولها او ناخد بالنا منها …”وفى كمان كلمه زى الرصاص الناس بتستخدمها وخاصه فى الارياف عن العانس انهم يقولوا عنها بايرة …وهى كلمه مشتقه من الارض البور الغير صالحه للزراعه ….طبعا اى بنت تتمنى تعيش بشكل طبيعى وتتجوز وتكون ام …لكن لو محصلش يعنى لان قدرها كده هيحصل ايه …فى بنات كتير زى الفل ..ومفيش نصيب ..اللى لازم يتغير هو نظرتنا للامور …وفهمنا …يعنى مصر فيها حسب الاحصائيات 13 مليون عانس 2.5 شاب و10.5 فتاة فاتهم سن الزواج …غالبا فى الريف والصعيد الى تعدى ال20 سنه بتكون عانس وفى المدن الى تعدى 30 سنه بتكون عانس …يعنى النظرة مختلفه …لكن الاحصائيات بتقول ان ال13 مليون عدوا سن ال35 …الجواز نصيب وقدر ومش فرض على فكرة …يعنى حتى ربنا قال ان الجواز ده استطاعه …وممكن البنت تكون ناجحه وتحقق ذاتها وتكون افيد للمجتمع …وبرضه ممكن بمشاعرها تكون ام فما اكتر الايتام فى مجتمعنا …بس سيبوهم فى حالهم وبلاش كل ما نشوف بنت مش متجوزة نمصمص شفايفنا ونتصعب عليها ونقول ان بختها مايل …خليكم فى حالكم وساعدوا الناس تنجح وتعيش زى ما ربنا عاوز مش زى ما احنا عاوزين