بصراحه انهرده شوفت فيديو في منتهي الجمال ، والاخلاق والذوق ، والجدعنه بتاعة المصريين ، الفيديو ده ليه قصه طويله حبتين ، بس تجاوب الناس هو اللي قمه في الروعه ،
اولا تبتدي القصه من شاب بيشتغل في دولة الامارات ، دارس ومعاه شهاده عليا بس اتخرج وملقاش عنده شغل زيه زي كتير من شباب مصر ، كان ادامه حليين يا اما يتنازل ويشتغل اي حاجه والسلام في مصر وهيتبهدل ويطلع عينه ، والمجتمع برده هيبصله باستحقار ، يا اما انه يسافر ولو اتبهدل مش مشكله عنده لانه هياخد مرتب هيعوضه ماديا ، وكده بهدله وكده بهدله ، فاختار يتبهدل بفلوس عالاقل يحقق حاجه من اللي عاش طول عمره يتمناها ، سافر وساب اهله فعلا عشان يحاول ينجح
في مكان تاني ربما يقدره المكان ده احسن من بلده ….. مين عارف ؟!
خرج وساب وراه حبيبته ، اللي وعدها انه هيتعب ليل نهار عشان يتجوزها ومتضيعش منه ، اشتغل سنه واتنين وعمل مبلغ كويس الي حد ما ، وبنت الحلال صابره في مصر ومستنيه ، ومفقدتش الامل ولا فقدت حبها ليه ،
قرر انه يتمم زواجهم ويكتب كتابه عليها ، ومكنش ينفع ينزل مصر ويصرف المبلغ اللي حوشه ، فلجأ لاخوه وعمله توكيل يتجوزله بيه عروسته ويتفق مع اهلها ويتمم كل حاجه ويبعتهالوا ، اخوه حزن ان صاحب الفرح مش موجود ، ومحدش من اهله يقدر يسافرله ،
ويفرح معاه ويباركله ويدعيله بالذريه الصالحه زي كل الافراح ، وصعبت عليه البنت العروسه اللي هتتجوز من غير فستان ولا ام تفرح بيها ولا اب يبكي عليها ولا صحاب واقفين جنبها لان الحال من بعضه زيها زيه ،
قرر اخو العريس انه يتصرف حتي لو مكنش موجود ، تمم الاوراق الرسميه والعريس هيقابل عروسته بعد ايام ، بعت رساله للجاليه المصريه في الامارات ، وطلب منهم انهم يستقبلوا العروسه مع اخوه عشان ميكنوش لوحدهم و يفرحوا معاهم ،
فور وصول الرساله للجاليه المصريه عرف بيها كل المصريين ،
المفجاه ان العريس راح فعلا عشان يقابل مراته فالمطار ومعاه بوكيه ورد ، اتفاجئ بناس بتسأله انت العريس قال ايوه واستغرب حكوله القصه وقالوله احنا معاكوا متخافوش وهنفرح مع بعض ، كانت اعداد كبيره ، وصلت العروسه وزفوهم من المطار لحد بيتهم واتفقوا معاه انهم هيعملولهم فرح “علي الاد” عشان يفرحوا معاهم ، و جهزوا للعروسه فستانها والبدله والجاليه اتكفلت بالمكان ، وكان الاحتفال احلي احتفال ممكن تتخيلوا وكأنهم موجودين بين اهلهم ، الكل فرحان بجد ، كل الستات بتهتم بالعروسه ، اللي بتعدلها الطرحه ، والله بيناول العريس شبكته اللي جايبهالها عشان يلبسهالها ، كله بيرقص وكله بيغني وكأنهم يعرفوا العريس والعروسه من ساعه ما اتولدوا ، انا سؤالي ليه منكنش كده علي طول ، لازم نتغرب ونتبهدل عشان نبئه كده مع بعض ؟ .
