مين مننا لما بتكون انسه مبتحلمش تكون عروسه ، وتكون ليها بيتها وجوزها واولادها ، حاجات ملكها ، تحافظ عليها وتزودها وتحس انها جزء منها ، ومن غير لف ولا دوران ، حتي ان كنا رافضين الزواج ومأجلين فكرة الفستان الابيض ،
لكن جوانا بيكون في فستان طويييييل وطرحه مجرجره عالارض و الكلام ده كله ، ممكن يكون لاننا ملقناش الراجل المناسب ، وممكن لاسباب تانيه مجهوله حتي لينا ،
لكن ما علينا انا هتكلم علينا بعد ما بنتجوز مقارنة بقبل الجواز ، استعدوا لمواجهة الحقيقه ،
قبل الجواز كل واحده فينا بتقول وانا ايه اللي هيجبرني ، فستين سلامه ، متعبش ، منزلش ، مروحش ، مقدرش ، بابا ميوافقش ، رايحه الكوافير ،
بعد الجواز استعدي انك تنسي الكام كلمه دول تماما ،
لان ببساطه الكائن اللذيذ اللي انتي بتكوني عليه فجأه بيتحول لكائن خارق عنده بتاع 300 ايد و300 رجل ، فجأه بعد الجواز علي طول بتلاقي نفسك بين شغل البيت والشغل ، 
عاوزه تحققي نفسك فالبيت وفي الشغل ده غير انك تثبتي للبيه جوزك انك ناجحه وتقدري تشتغلي وتبئي متجوزه وتنفدي من دعواته بتاعه يارب ترجع متاخر ولا تغلط عشان يدب خناقه وتعدي من شغلك طبعا ومن غير اي سبب ،
وبعدين تبدأي تدخلي في دوامة العيال وانتي حامل وتجري عالدكاتره والبيه عنده شغل او راجع تعبان روحي لوحدك ، شويه والبيه مش مستحمل تعبك روحي عند مامتك ،وتقومي بالسلامه فبقدرة قادر تلاقي نفسك معاكي طفليين مع انك ولدتي واحد
عشان البيه جوزك مش مسحمل اهتمامك الزايد بالبيبي ونسياه ومش بتهتمي بيه ولا بنفسك ، ده غير البيت والاكل ، يبدا ابنك يقف علي رجليه وكلوا تمام ، فجاه تلاقي نفسك لازم توديه النادي كله الا الولاد ، فتقرري انك تسوقي عربيتك توديه وتعدي بيه وترجعي تطبخي وتنضفي وتنيمي وتاخدي بالك من طلبات جوزك ومامته اذا تطلب الامر ،
وبيظهر فالوقت ده الكائن اللي بيقلك ابنك او بنتك محتاجين اخ لازم تجيبي بيبي ، فتجيبي بيبي اهو الاطفال احباب الله وهيبئوا عزوه بردوا ، تدخلي تاني فدوامه البيبي ،
وجوزك عايش فدور العريس الصغنون بئه لان المدام حامل تاني ، وانتي للاسف من الهم اللي عندك مش هتحسي بدور العروسه ، وابدأي في معاناه الحمل والولاده والدكاتره والنادي والمدرسه والطبيخ والغسيل والمكوي والتنظيف و المذاكره والنوم والصحيان ،
وساعتها لازم تقولي حاجه واحده بس ” متحسبوش يا بنات ان الجواز راحه ” لا ده عدم راحه ، بس احلي ما فيه هو بيتك ومسئوليتك عن كل حاجه ، وهيبئه احلي لو علمتي شريك حياتك يساعدك فحياتكوا .
