الناس اتغيرت قوي ،ده كان رأي مدام عزه زميلتنا هي في اواخر الاربعينات كانت مضيفه جويه اما اتجوزت غيرت شغلها عشان الولاد و البيت وبقت مدرسه ،كانت بتحكي علي زميلتها اما كبروا بقوا يعطوا محاضرات للمضيفات الجدد، وهي مدرسه المهم قعدنا نهون عليها وقعدت تحكي عن زميلاتها اللي كانت ممكن اي واحده يحصل لها ظرف طارئه وهي تقوم برحلتها عن طيب خاطر،ودلوقتي عايزه واسطه عشان بنتها تشتغل محدش معبرها ، اللي تقول: ياريت كان بأيدي كنت شغلت بنتي واللي متردش واللي تقول ربنا يسهل يعني من الاخر هي كان نفسها حد يفتكر الجمايل والصداقه، وطبعا اوضه المدرسات اتقلبت لنكد كل واحده ابتديت تفتكر مقالب الاصحاب ،يعني شوشو افتكرت صاحبتها الانتيم اللي خطفت خطيبها ،ودودو افتكرت صاحبتها اللي بعد ما اتجوزوا بطلوا يعبروها وانشغلوا بحياتهم ،وايمو اللي بعد ما اطلقت محدش عايز يدخلها بيته لا تخطف اجوازهم ، ولولو اللي صاحبتها خطفت منها الشغلانه، و روبي اللي متجوزتش والكل خايف لو دخلت بيتهم تحسدهم ،النكد وصل لاعلي مراحله اما يوكو قالت علي صاحبتها اللي زعلت عشان ولا عريس اتقدم لها وفي وشها تقول لها اشمعني انتي انتي احسن مني في ايه بيحبوكي وبيتقدموا لك انتي ليه ومحدش معبرني انا اشمعني انا في وشها كده عيني عينك، اما فوفا و دي من كبار الاوضه علي راي المثل “في ناس عامله زي السمك اشكال والوان بس الزفاره واحده” قالت كلام مهم :لو صاحبك موقفش جنبك في ازمه يبقي مايلزمش ولو ماخدمكش زي مابتخدمه وفر حالك علي نفسك ،الناس معادن وكل واحد معدنه هايبان في الشده.
