كيف تصبح مواطن صالح ؟!

سؤال حيرني كتير جدا جدا ، ازاي اكون مواطن صالح ، اقصد يعني اعمل ايه فاستحق لقب المواطن الصالح ؟ ، او بمعني تاني اكون تبع مين فاكون مواطن صالح ؟ ……

الحقيقه السؤال ده مش حيرني بس لا ده جنني ،

المشكله عندي هي اني مش قادره احدد مين الصالح فاكون معاه واكون زيه صالح ، يعني زي المثل ما بيقول ” جاور السعيد تسعد وجاور الحداد تنكوي بناره ” ، مثلا قبل الثوره في عهد مبارك ، كان المواطن الصالح هو اللي بيقول انا عضو في الحزب الوطني ، او يقول عندي خالو عضو فالحزب الوطني او فلان فالعيله ، وطبعا كل ما تكون القرابه من الدرجه الاولي تزيد صالحيتك كمواطن ،اما لو كنت مش بتاع سياسه ، علي الاقل لازم تدعم الرئيس ولو حتي بقلبك ، ولو اتسألت ايه انجازات الريس ترد تقول حاجات كتير اولها صاحب الضربه الجويه الاول في حرب 6 اكتوبر ، وغرق البلد كباري ، وحاول تجود فالكلام طبعا وتزود علي قد ما تقدر ، او ترد وانت بتزعق وتصرخ وتبرئ وتقول ، اه ماله الريس بئه فهمني ما احنا عايشين فخيره زي الفل اهو والبلد تمام والسياحه زي الفل ، كده انت مواطن صالح بنسبة 100% بالاخص لو قلت الكلام ده قدام ضابط امن دوله .

اما بئه مرحلة الثوره ، المواطن الصالح هو المواطن الثائر ، اللي نزل ميدان التحرير وشافله كام واحد من اصحابه بيموتوا علي ايد الداخليه او البلطجيه او غيرهم ، ودايما معترض بس معندوش حل ولا اقتراح يصلح حال البلد ولا يصلح حاله شخصيا ، بس برده مننكرش انه بطل وقدر يخلصنا من حكم 30 سنه ، مواصفات المواطن الصالح الثوري ، انك لازم تكون بتكره مبارك ، وبتشتم فيه ، وعارف كويس جدا نقط الظلم اللي وقعها عالشعب ، وانك تقول انا كنت فميدان التحرير ، حتي لو مكنتش هناك ، مش مشكله هيعتبروك راجل وطني برده ، انت كده مواطن صالح بنسبه 80% ، اما اذا اتعاملت باخلاق الميدان يومين تلاته يعني تقول للناس مترموش زباله فالارض تنزل تدهن كام رصيف ، تعد تتكلم فالسياسه عمال علي بطال ، فانت كده بئيت بنسبه 100% .

مرحله المجلس العسكري ، عشان تكون مواطن صالح لازم دايما توافق علي اي حاجه الجيش بيعملها ومتعترضش وان اعترضت اعترضلك بتاع 6 ساعات بالكتير وارجع بيتكوا تاني ، ودايما اذكر عبارات ” الجيش هو اللي حامينا ” ” الجيش ملوش دعوه بالمجلس العسكري ” ” دي فتره انتقاليه ” وغيرها من الجمل اللي بتسمعها من الاعلاميين .

مرحله الانتخابات ، دي بئه ” سمك لبن تمرهندي ” اعمل اللي انت عاوزه فيها ، لكن يستحسن تختارلك مرشح ، وكل متسمع حد بيتكلم علي غيره ، اعترض و زعق ، واحكيله عالمناضل اللي انت اختارته ، وانجازاته الخفيه فالبلد ، والكلام المدهون بزبده اللي بيقولوا  وامدح فيه وفنسبه وتاريخه الطويل من السعي وراء الثوره .

* اه نسيت اقولك اول ميكسب واحد من المرشحين انسي خالص اي كلام قلته علي مرشح غيره ، ومتردش علي حد ، يقلك شوف يا سيدي اهو الراجل بتاعنا اللي كسب ، طنش وتنح .

اما مرحلة الاخوان ، عشان تبئه مواطن صالح بنسبة 100% ، متقلش غير نعم ، منين متروح انت موافق جدا علي كل حاجه ، ودايما حسن تفكيرك في المبررات ، في وقت فراغك حاول تتخيل مبررات ، وممكن تستخدم التخيلات دي فيما بعد انك تكون مخرج سينيمائي ممتاز ،كل اللي تلاقيه معترض وبيلومك عالوضع اللي البلد فيه ، قولوا “ادولو فرصه ” ، ومتنساش تكون جاهز عشان تنزل تدعم اي قرار .

يتبع ……..