ماشي يا ست ليلو..يللا نجيب العصير بتاع ليلو من عمو ونروح نشربه بسرعه..
طبعا كان بجد موقف محرج جدا اني عماله اكلمها قدام الناس اللي تقريبا قرروا يسيبوا المكان بسبب ليلو و كمية الصوات والزن اللي هي زنته..ما كنش لسبب أو حاجه أكتر من انها عاوزة تتمشى مش تقعد..وطبعا ده أول معطى انا جنيته نتيجة اني باخد رأيها في كل حاجه هي طرف فيها وطبعا لأنها طفلة مش هاتبقى عارفه احترام حقوق الغير يكون ازاي..ما تستغربوش بجد..يا جماعه الطفل فاهم كل حاجه..وكل شيء بيكون عبارة عن خط بيترسم بريشه رفيعه في لوحة ناصعة البياض..وخط بجانب آخر تكتمل اللوحة..
طبعا الموقف ده كان ممكن يعدي على أي حد تاني..ايه يعني..طفلة بتزن حبة وعاوزة حاجه..وعليها نسكت وننفذ طلبها عشان نشتري دماغنا ولا كأن حصل حاجه..بس لأ..غلط..كل موقف بيكون فعلا له مدلول..واذا مااشتغلناش على هذه المدلولات يبقى هنسمي نفسنا بنربي ازاي أو بالأحرى بنربي بوعي ازاي ؟؟
معلش معلش هي واضح ان ليها شخصية..
اسمعي كلام مامي يا…
اسمها ايه ؟
ليلو..
الله يا ليلو اسمك حلو..اسمعي كلام مامي اتفقنا..
بصي أنا بشوفك كتير هنا..أنا مدام/ كلير.. انتي لازم تحاولي تكلميها وتفهميها أكتر..ماتقوليش انها صغيرة دلوقتي دي مدموازيل كبيرة..أهم حاجه أقولك عليها انك لازم تتعاملي معاها هي مش مع الناس..مش مهم انهم اتضايقوا أو انهم بيبصوا عليكي..ايه المشكلة!! المشكلة بجد ان بنتك لازم كلامك معاها يكون أقوى ويكون بناء على شخصيتها هي والمدخل بتاعها هي مش بناءا على انه ده ينفع أو ماينفعش يتعمل..ده هايجي بعد كده لما تعرفي تدخليلها ازاي الأول..لأن دلوقتي وقت التربية وبناء الشخصية..
الكلام ده قالته لينا مدام/ كلير صاحبة المكان وختمته بضحكة عميقة وهي تربت على كتفي ثم مسحت على شعر ليلو وانصرفت..انها سيدة في اوائل الخمسينات..فرنسية الأصل..تتكلم العربية بصعوبة ويتخلل كلامها العديد من الكلمات الفرنسية..يعتلي وجهها ملامح ارستقراطية حادة تحاول هي ان تكسرها بابتسامة مشرقة تبعث على البهجة..
ليلو بصي مامي هاتشرب الموكا ونروح نجيب أجمل بالونة في المول..خدي العصير ده وتعالي نتفرج على الكتاب بتاعك..
دائما أحمل لابنتي احدى لعبها المفضلة أثناء الخروج في محاولة مني لانشاء علاقة بينها وبين أشيائها وأيضا كي أتغلب على اللحظات الصعبة حينما تبدأ نوبة البكاء..
أخيرا ابتسمتي ورضيتي..يارب يا هادي..وفقني أشرب الموكا اللي اتسخنت للمرة الرابعة وأشك انها بقت موكا طبيعية..
