نفسى أناااااااام

يا جماعه هو ربنا سبحانه وتعالى مش خلق الليل علشان ننام فيه ولا ايه أومال فى ايه الدنيا بقت مشيه بالعكس فى كل حاجه حتى النوم ؟

* أنا نفسى انام بجد ومش عارفه أنا هقولكوا ايه بيحصل كل يوم .
* أفضل استنى الساعه 12 بالليل تيجى علشان اتكلم مع خطيبى وطبعا طبعا بكون على اخرى ونفسى اخد السرير فى حضنى وانام المهم .
* نتكلم الساعه 12 وبعدين تجى علينا الساعه 1 يلاا ننام يا حبيبى علشان انت هتصحى بدرى لشغلك وانا كمان هقوم اساعد ماما فى البيت يقولى لسه بدرى انتى مستعجله على ايه ادينا بندردش .طبعا اسكت واعديها ونتكلم تبقى الساعه 2 اقوله نفس الكلام ويرد نفس الرد ؟
* طب اعمل ايه طيب وعلى الحال ده لحد الفجر يقولى اسيبك بقه ونقوم نصلى وننام؟ طب اعمل ايه ساعتها بقه
*طبعا ارد بمنتهى الادب خلاص ماشى تصبح على خير وانا من جوايا ببقى هموت واخنقه.
* المهم اصلى الفجر والحمد لله خلاص بقه هنام ادخل على السرير وافضل اتقلب يمين وشمال ما خلاص بقه النوم طار من عنيه زى ما بيقولوا.
* فين وفين لحد ما انام الحمد لله .
*اسمع صوت كده كأنى بحلم وبعدين مع التكرار اتأكد انه مش حلم واركز فيه الاقيه صوت موبايلى بيرن اجيبه وابص عليه الاقيه خطيبى؟؟
*الو .ايه ده انتى لسه نايمه يا بنتى الشمس طلعت من بدرى ؟ ارد طبعا وانا مش فى وعيى هى الساعه كام دلوقتى . يقولى 9 انا قمت وفطرت ولبست ونازل اروح الشغل بس قولت اصبح عليكى ؟ طبعا ارد فى دهشه هو انت نمت وصحيت ايوه يا بنتى عادى انا اصلا متعود على كده ولازم انتى كمان تتعودى؟ طيب ماشى خلى بالك من نفسك يرد وانتى كمان ونقفل .
* طبعا انا المفروض انى انام تانى شويه بقه خلاص مفيش ازعاج واعتقد انى قبل ما اروح فى النوم مش بحس غير بباب الاوضه بيتفتح وأمى ربنا يخليهالى بتقول كالعاده قومى يلاا الساعه 10 هتفضلى نايمه كتير ؟
* طيب يا ماما شويه وهقوم . لا مفيش شويه دلوقتى ورانا حاجات كتير هتتعمل وطبعا لازم وحتما ولابد اقوم اومال اعمل ايه طيب.
* خلاص شغل البيت خلص واتغدينا وحلينا والاطباق اتغسلت اول حاجه افكر فيها .
*انى اقول لماما انا هدخل على السرير شويه بس للاسف مش بلحق اكمل الكلمه لان ببساطه خطيبى بيكون رجع من الشغل ؟؟
*وطبعا لازم نرغى شويه ولا ايه ؟
* وبعد الكلام معاه طبعا تكون المغرب اذنت ووالدى جه من بره واول كلمه اسمعها منه ساعت ما يدخل اومال بنتك فين ؟؟
* ولازم غصب عنى اقوم واقعد واضحك واهزر واتكلم لحد ما تبقى الساعه 12 ونبتدى من الاول .
طب انام امتى طيب حد يجاوبنى ؟؟؟