اكتر حاجه زعلتنى النهارده واحد سواق توك توك راجل كبير بيقول اهو النقاب ده اللى مرجعنا ورا وهو ده المشكله ………. دى حريه شخصيه يعنى علشان ابقى كويسه لازم البس اللى بيتلبس اليومين من لبس ميتلبسش اصلا ؟؟؟؟؟
النقاب الناس دلوقت بتشوفه رمز للاخوان او السلفيين اه الاخوان وحشين بس ايه ربط الاخوان بالنقاب دول ناس بتوع سياسه مش بتوع دين وانا مش منتميه لاى حزب لان شخصيتى كده معرفش اتحط فى برواز لازم اكون حره فى طريقه تفكيرى …….
بجد زعلت جدا الحمد لله تعليمى عالى وقريت كتير ليه واحد زى ده يتكلم عليا او حتى النقاب ده امر من ربنا وكل واحد ليه معتقداته الخاصه انا مقتنعه ان ده هو الصح محدش يحكم عليا وليا اصحاب بيلبسوا بناطيل عادى ملييش دعوه اهم حاجه بقولها طالما انتى مقتنعه بالل انتى عاملاه وهتقابلى بيه ربنا خلاص وحتى من غير ما اقول كل واحد ليه حريه يعمل بيها اللى هو عايزه لان كل واحد هيتحاسب على اعماله وطالما مضرتش حد محدش يحاسبنى …………..
ليه حد يقولى اقلعى النقاب انا حبه نفسى كده حابه ان مفيش حد يستمتع بجمالى غير جوزى اكون ليه اجمل واحده فى الدنيا وليه هو وبس…..
وحتى لو الناس مش شيفانى حلوه مش بالجمال اللى المفروض يغطيه النقاب عاديه انا شايفه ان بنقابى هكون اجمل بحس انى ملكه متوجه بجد قبل النقاب كنت بسمع مديقات ومعاكسات وده بقي العادى فى مصر بعد النقاب الحمد لله يبقي انا صونت ودانى من اللى كنت بسمعه .
مواقف كتير مشابهه موقف تانى حصل كنت راكبه مواصلات لقيت واحد بيبص عليا اوى كده وقعد يقول الاخوان دول وحشين وقعد يعلى صوته جامد طبعا كنت لوحدى عملت ان الكلام مش عليا مش عارفه الناس فى مجتمعنا بتفكر ازاى ……….
بيدايقنى اوى لما حد يقولى عملتى فى نفسك ليه كده هو انا عملت ايه داريتى جمالك ده انتى كنتى حلوه هو انا بقيت وحشه مانا زى مانا حتى المتعلمين واصحاب الشهادات مبخلصش من كلامهم……..
كل اللى انا بتمناه ان كل واحد يسيب الناس فى حالها محدش يحكم على حد كل واحد ليه ظروفه وفكره الخاص بيه انا مبحكمش على حد ومش عايزه حد يتدخل فى حياتى الفكره لو قلعت النقاب ان الناس مش هتستفاد حاجه ولما البس النقاب برضو المفروض انهم مش هيخسروا حاجه سبحان الله يعنى اخواتنا في الدول الاوروبيه بيتعاملوا وحش بس علشان لابسين الحجاب او الطرحه هنقول ماشي الغرب ليه معتقداته ودى حاجه دخيله عليه او جديده نسبيا طب ليه فى المجتمع الاسلامى ميكونش العكس ان اللى ماشيه بشعرها دى الحاجه اللى دخيله عليه ليه النقاب بقي عيب ايه اللى وصلنا لكده انا مش جايه علشان اقول ايه الصح وايه الغلط بس بتمنى ان كل واحد يسيب الناس فى حالها …………………………..
اللهم ارنا الحق حقا وارزقنا اتباعه وارنا الباطل باطلا وارزقنا اجتنابه ………..
واسفه على نبرتى الحاده بس كنت متعصبه جدا
