الحلقه الرابعه
حنان سرحانه وتليفون البيت بيرن وهي مش سامعاه وفجاه اتخضت وسمعت التليفون وردت عليه
حنان:ألو ازيك يا ميرفت فينك مش بتسألي عليه ليه
ميرفت:معلش والله ظروف انتي فاضيه اجيلك نقعد سوا شويه ندردش
حنان:اه الاولاد لسه مارجعوش من المدرسه وحسين هيتأخر تعالي هستناكي
ميرفت :طيب انا هلبس واجيلك علي طول
ميرفت جاره حنان في نفس العماره وهي الوحيده في العماره كلها اللي صاحبه حنان
حنان:اهلا وسهلا وحشتيني اوي
ميرفت:وانتي كمان والله كل يوم اقول هكلمك واجيلك بس بتشغل معلش وانتي مش بتسألي خالص
حنان:معلش ما انتي عارفه البيت والاولاد والمذاكره
ميرفت :انا عارفه ربنا معاكي حسين والاولاد عاملين ايه
حنان:الحمد لله كويسين وانتي اولادك عاملين ايه
ميرفت:الحمد لله
حنان:ثواني وهجيلك تشربي ايه
ميرفت :ممكن شاي انتي مشغوله بتعملي حاجه
حنان: لا انا قربت اخلص بجهز اكل لبكره عشان حماتي جايه تتغدي معانا وانتي عارفه البيت بيبقي مكهرب هخلص بس المحشي تعالي طيب ونكمل كلام في المطبخ
ميرفت: طيب وممكن اساعدك في المحشي عشان تخلصي بسرعه
حنان: ربنا يخليكي
ميرفت:بس انتي شكلك في حاجه مرهقه او تعبانه
حنان:لا العادي يعني مفيش جديد
ميرفت:في حاجه شاغله بالك
حنان:لا مفيش بس عشان حماتي جايه بكره وانتي عارفه مش بتحبني مهما عملت ومرات ابنها التاني بتموت فيها عشان بنت اختها مع انها مش بتعمل اللي انا بعمله
ميرفت:معلش انتي بتعملي اللي عليكي وربنا عالم وجوزك بيحبك وهي لما بتيجي بتعملي معاها الواجب وخلاص
حنان:ربنا يستر بحس اني عندي امتحان
ميرفت:ليه بس ده انتي استاذه في المطبخ ما تقلقيش وان شاء الله هيبقي يوم جميل
حنان:ان شاء الله بس انتي اللي شكلك في حاجه مالك
ميرفت:مفيش بس حاسه ان جوزي ما بقاش زي الاول معايا
حنان:ازاي في مشاكل ولا ايه
ميرفت:لا مش مشاكل احنا كويسين بس حياتنا بقت روتينيه اوي ونفسي نغير جو نسافر في اي مكان او نخرج خروجه حلوه
حنان:طيب ما تسافروا شرم الشيخ او الغردقه الجو دافي وحلو ممكن تسيبي الاولاد عند والدتك يومين ولا تلاته وروحوا غيروا جو وان شاء الله ترجعوا احسن من الاول
