امي حبيبتي محتاجه لك قوي
محتجالك يا أمي !
ياه الام دي نعمه كبيره ميعرفش قيمتها غير اللي اتحرم منها،
انا امي ماتت وانا صغيره ابتديت احس بيقميتها قوي اما ابتديت اكبر
وبالذات في السن اللي بيجي العرسان تدق علي الباب والبنت لوحدها مش عارفه تقول لمين
مين ينصح من قلبه، مين يقول ده ينفع وده مينفعش والاكتر ان والدي اتوفي قبلها فلا اب ولا ام ،
كان بيبقي موقف صعب بالذات والعريس قادم هو واهله عايز حد يناقشني
ايه رايك طب عيوبه مميزاته مستواه تعليمه صفته نعته مش زيد زي عبيد،
وبالذات اما تشوفي حد مستكتر وباين في عينه نظرة خساره فيكي بنتي كانت تستاهله عنك
ياه النظره دي لاتنسي ،
فضل الام في حياة ابناءها
قد ايه الام حضنها مهم في الازمه، رايها مهم في المشاكل ،
احلي احساس اما الواحد يصبح علي امه بتليفون عامله ايه يا ماما اخبارك ايه
اخذتي الدوا طب محتاجه حاجه اعديها عليكي ناقصك فلوس،
ياه ولا جملة هعدي عليكي لا اطمني مافيش حاجه عايزه اقعد معاكي اتونس بيكي ،
ولا الجمله الجامده ياه تعبتي نفسك ليه ياست الكل كل دي حاجات ياماما كلفتي نفسك،
ياه ولا الواحده اما امها تدخل عليها بحاجات قدام جوزها تبقي راسها مرفوعه للسما ،
ولا اما تولد والعائله كلها الام تلمها ويبقوا تحت رجليك ،
ولا خناقه مع جوزك وامك تقول مايصحش كده وتقف مع جوزك حتي لو انتي غلطانه
وتشتري خاطره وتيجي عليكي وهو يقدرها واما تنزل يقول امك دي بميت راجل مافيش زيها،
ولا الجمعيه اللي تعملها عشان تفك زنقتك وتربط الحزام عشانك وتقولي هرجعها تقولك ابدا
وتحلف الف حلفان ابدا الله يعينك يابنتي،
ياه الام حضنها ده هو الامان اللي في الدنيا النعمه اللي لو ضاعت عمرها ما هترجع ،
الدعوه اللي تفتح الابواب المقفوله بمليون قفل ،
الام يمكن عندي اهم من الاب
هي اللي بتربي وتهتم وترعي وتحن وتدي كل اللي عندها متستخسرش في ولادها اي حاجه.
قريت حكايه واحد كان بيستعر من امه عشان كانت بعين واحده بعد ما بقي مهندس كبير و هاجر و الجيران ودوها دار للمسنين و ماتت وهو بيستلم حاجتها قرا جواب كانت سايبه قالت عن الحادثه اللي عملها وهو صغير وفقد عينه وطلبت من الاطباء انهم يعطوه عينها عشان ميضيعش مستقبله هي دي الام الراضيه الجدعه هي دي الام
