الخدعة الكبرى هو ده احساسك اما حد يغشك ،فاكرين اما عادل اما قال وقعنا في الفخ ده احساسي بالضبط
النهارده بعد ما وقعت في الفخ،الاحساس ده بيجي لي كتير مثلا اما بشتري بقالي سنين من راجل في السوق
فاكره انه ارخص واحد و انظف واحد وطلع انه بيخدعني في الاسعار
خدعه اما افتكرت ان المدرسه العظيمه اللي بشتغل فيها بتريح المدرسين ومش هتصدرنا للاهالي اللي بدل
ما يدعو علي اصحاب المدرسه بيقصروا وما بيتعبوش دماغهم ويفكروا فايدعوا علي المدرس اللي قدامهم
خدعه اما افتكر ان حماتي بتعجب بكل حاجه بجيبها لها وكل حاجه بعملها وفجاه اعرف انها بتلعن في ام الجابوني
خدعه اما اقعد اسبوع اجهز للعزومه وافتكر ان المعازيم عجبهم الاكل واما ادخل اسمع التريقه بوداني
وادخل فجاه اللاقي وشهم جاب الوان
خدعه اما كانت امي توهمني اني احلي بنت في الدنيا ،خدعه اما يقعدوا واحنا صغيرين يسالونا هتطلعي دكتوره
ولا مهندسه وده من وانت صغير يخليك بتحلم يا ده يا ده والصدمه في الثانويه العامه بتحدد مصيرك
خدعه اما جوزي يوهمني اني اول واخر حب وفجاه بقدرة قادر اعرف تاريخه العظيم ومغامراته قبل وبعد الجواز
وياسلام لو روحنا نفس المكان او بالصدفه سمعنا نفس الاغاني صباح السرحان ،صدمه اما يخلص الاطباق
ويمسحهم وبعد كده وابل من التعليقات السخيفه زي البشاميل بيتحط علي وشه بيضتين ودقي التومه
خدعه صاحبتك اما تحاول تكرهك في عريسك اتاريها بتحاول تكلمه وهو مش معبرها
خدعه اما تلاقي اصحابك كلهم عايزين ساعة جوازك يفرشوا اتاريهم عايزين يتفرجوا جايبه ايه وايه الغالي وايه الرخيص
خدعه اما زملائك في الشغل يحاولوا يوقعوا بينك وبين المدير ويحاولوا يعملوا اصحابك ويلمعوا نفسهم قدام المدير
وتضيعي مش مهم و ده بيسموه منافسه
وياسلام من الخدعه بتاعت الست الوالده انا هموت لازم تتجوزي عايزه افرح بيكي واشوف عيالك فيبقي الهدف في العريس وبس و ده الحلم اللي نصحي ونقوم عليه فرح اي حد من قريب او بعيد لازم احضره عشان الحق اتجوز بسرعه حد يشوفني ويا سلام اما تشدني و تزقني عشان اتصور فاظهر واتجوز
ياه كل دي خدع ،حقا لقد وقعنا في الفخ.
