كتير مننا بيفكر انه ممكن يغير شخص قريب منه ، مثلا صديق حبيب او حتي اخ او اخت ، تغير صفات او تغير كلي ، ممكن يكون تغيير ظاهر او مش ظاهر ، بس هل ممكن تعمل كده مع حد ايا كان ؟! ….،
سؤال صعب ، والاكيد ان معظمنا حاول يغير ناس في حياته ويعدل في صفاتهم ، او يأثر عليهم بنموذج هو متخيله ، او بيفضل ان الشخص ده يكون زي ما هو عايز ،
طيب هل التجربه دي بتنجح ؟! ، فالحقيقه انا هتكلم عن تجارب شفتها وعيشت واحده منهم ، انا مثلا حاولت اغير شخصيه في حياتي ، وكنت بغيرها فعلا ، يعني فجأه الانسان اللي بتكون بتحاول تغيير صفات فيه ، بتلاقي انه بيتغيير فعلا ،
وتشعر انه تغيير جذري ومفيش رجعه للصفات القديمه ، لكن عشان مكونش كدابه ، كان التغيير لفتره مؤقته ، ممكن يكون لاني اثرت فالشخص ده فمشاعر معينه ، فاضطر انه يحس بالامان الشديد وبدأ يتغير من غير ما يشعر ، بس فجأه طبيعته بترجع تاني ،
وبتكون اقوي من الاول بميت مره ، وده طبيعي لانه بيحس ان الصفات اللي مش عجباني مثلا دي اساسيات فيه وانا بتعدي عليه وبقتحم حاجه مينفعش اقرب منها ، ويبدأ العند ، وعلي حسب المقاومه بتاعه الشخص ده انه يستسلم مره تانيه للتغيير ولا لا ،
هتحاول انك تغير مره تانيه لكن للاسف التغيير هينتكس تاني ، دي كانت تجربتي ن وللاسف في صعوبه كبيره وانت بتغيير في شخص ما لانك بتحط ادامك هدف معين انك تغيير الشخص ده عشان يبئه مناسب مش مثالي او كامل ، ولما بينتكس التغيير ،
بتكون انت شخصيا قدام مرايا بتقلك ان الشخص ده غير مناسب وان انت بتعافر في الصخر زي ما بتقولوا ، وكان نفس السيناريو مع كل حد اعرفه حاول يغيير في شخص في حياته ،
ممكن ببساطه بعد ما تمر بالتجربه دي تقر ان مينفعش تغيير حد ، او عالاقل متتجأش انك تغيير حد تغيير جذري لام مهما اتغيير معاك هترجع ريما لعادتها القديمه ،
وده معناها ان الشخص اللي انا بتعافر معاه غير مناسب ليك بكل بساطه او انك لازم تقبله زي ما هو كده بكل تفاصيله وملامح شخصيته ، وانك يا تحس انك مش قادر تقبله يا تحس انك لازم تكون لينك مشترك بينكوا وان ممكن تقبل صفاته اللي مش عجباك وتفهم منه ليه الصفات دي فيه او الاساسيات في شخصيته او ممكن تكون اسلوب حياته اللي صممه عشان يكون مبسوط في حياته ،
وانا من رأيي وتجربتي اقريت فعلا ان انا لو مقبلتش شخص زي ما هو مش هحاول اغير فيه تغيير جذري بس هعمل جوايا مناعه اتقبل بيها شخصيته بدون نقصان او زياده ، والحياه كفيله انها تغيير انسان بالتجارب ، اما لو في استحاله لتقبل الصفات دي خلاص ببساطه ده شخص غير مناسب .
