الحلقه الثانيه
اثناء الغداء دار الحوار ده بين حنان وحسين
حنان:بكره الخميس ياحبيبي وكنا عايزين نخرج بعد الشغل الاولاد بقالهم كتير في ضغط المذاكره والمدرسه وطلبوا مني انهم يخرجوا بكره ايه رأيك
حسين:لا مش هينفع خالص عشان انا هتأخر شويه بعد الشغل
حنان:هتتأخر ليه عندك مشوار يعني
حسين:لا اصل المدير كلفني بموضوع كده وهتأخر ساعتين كل يوم
حنان:موضوع ايه
حسين:في محاسبه جديده اتعينت في البنك وانا اللي هدربها
حنان:طيب انا ذنبي ايه انا والاولاد احنا نفسنا نخرج
حسين :طيب خليها يوم الجمعه
حنان:انت يوم الجمعه بتصلي الجمعه وتفضل تتفرج علي التليفزيون ولو حد كلمك بتفضل تزعق وتقول ده يوم اجازتي وعايز ارتاح وكمان انت نسيت ان والدتك قالت انه هتيجي يوم الجمعه تتغدي معانا
حسين:والحل ايه
حنان:مش عارفه بس اللي اعرفه ان الاولاد عايزين يخرجوا
حسين:طيب ممكن تأجلوا الخروجه للخميس الجاي وانا هحاول ان شاء الله اكون خلصت التدريب ونخرج سوا بس قولي لعمر ونور مايزعلوش
حنان:هحاول معاهم بس يارب ما يزعلوش وبعدين مين الموظفه دي وصغيره وحلوه ولا ايه شكلها ايه متجوزه ولا انسه
حسين:ايه كل الاسئله دي انا لسه ما شفتهاش وبعدين ايه الفرق سواء متجوزه ولا لا ما انتي عارفاني كويس الشغل شغل وبعدين انا بحبك ولا ايه
حنان:انت بتضحك عليا بكلمتين حلوين
حسين:لا والله ياحبيبتي انا مش بشوف حد غيرك وبعدين ما قولتيليش هنتغدي ايه يوم الجمعه ماما جايه هتشرفيني ولا ايه
حنان:وانا من امتي مش بشرفك ده انت عيلتك كلها بيحلفوا بأكلي
حسين:وانا قلت حاجه غير كده طبعا ياحبيبتي ربنا يعدي اليوم ده علي خير
حنان:انا مش عارفه مامتك حطاني في دماغها ليه مع اني والله بحبها ومش بعمل حاجه تزعلها
حسين: معلش بقي ياحبيبتي شغل حموات
حنان:عموما انا عامله حسابي هعمل محشي ورق عنب وفراخ مشويه وملوخيه وشوربه ايه رأيك تحب اعمل حاجه تاني
حسين:انتي جوعتيني تاني وهستني يوم الجمعه من دلوقتي
حنان:انا هقوم اصحي الولاد كفايه كده نوم لسه هيذاكروا
حسين: ربنا معاكي انا هدخل انام شويه وصحيني بعد ما تخلصوا مذاكره عشان عندي صداع وانتي والاولاد بتعملوا صوت عالي وانتوا بتذاكروا
حنان:اه طيب الف سلامه عليك ياحبيبي
حسين:الله يسلمك ياحنان مالك بتقوليها ليه من تحت الضرس
حنان:لا ابدا بس بحس ان دول ولادي لوحدي
انتظروا الحلقه القادمه
