القرع العسلى فوايده كتير جدا فهو يحتوى على نسبه عاليه من البوتاسيوم وقدر عالى من فيتامين ” أ”
بس مش كل الطرق تخليكى تحبيه الطريقه دى حلوه اوى انا واخداها من حماتى
هو القرع بيكون كبير شويه وقشرته طخينه فخلى حد يقطعهولك وخدى بالك لازم السكينه تكون جامده وبعدين بتقطعيه مكعبات مش مهم كبيره ولا صغيره .
ملحوظه احنا بنغسله قبل التقطيع علشان بيكون عليه تراب كتير اوى من بره .
لو حسيتى انه كتير عليكى لانه بيكون كبير ممكن بعد ما تغسليه تسبيه يتصفى وحطيه ف اكياس وعلى الفريزر حتى الاستعمال وبيكون حلو اوى .
نيجى للباقي اغسليه كويس وحطيه فى حله وغطيه بالمايه وحطيه على نار هاديه حتى السوى .
سبيه يبرد خالص وحطى السكر اللى يناسبك واضربيه فى الخلاط .
حطى لبن حليب عليه بمقدار اتنين كيلو وحطى معلقتين سمن بلدى او زبد لو وجد .
حطى الحله تانى على النار حتى الغليان .
الخطوه الجايه بتتحد على حسب المقدار اللى انتى عاملاه
بنجيب كوب ماء وعليه نشا حوالى ربع كيلو ونسيبه يغلى مع التقليب المستمر والتقليب فايدته انه ميكلكعش زى الرز بلبن او الكستر كده .
اخر خطوه هى وضع الفانيليا وبنسيبها للاخر علشان متمررش .
يوضع فى اطباق وتزين بجوزه الهند والزبيب .
ويترك ليبرد ثم يوضع فى التلاجه .
يقدم بارد وبالف هنا
