يومياتي مع حياتي (ليلــو) 8

قررت اني النهاردة ورغم عدم نومي سوى 3 ساعات خلال 36 ساعة اني اخد ليلو وننزل نخرج شوية..كان اول مرة اخدها ونروح المول اللي ياما مشيت فيه وهي لسه في علم الغيب..قررت ان اليوم مايعديش من غير مانعمل حاجة مفيدة..كنا اول اتنين ندخل المول التجاري وكانت ليلو حبيبتي مبسوطه أوي..وكالعادة اتوجهت لمكاني المفضل حيث القهوة الايطالي اللمزوجة بالشوكولاته الدافئة لأداعب تلافيف مخي اللي ساح من عدم النوم..وهانام ازاي ماهي ست ليلو بتسنن وطول الليل صاحيين عشان السنة اللي مش راضية تطلع وكأنها هتعدي المانش مش هتشق حتة لسة رقيقة زي الورقة..

حضرتك كمان نص ساعة ممكن تعدي علينا..نعم !!! لسه نص ساعه بحالها..لا لا لا..مش ممكن..طيب..بلاها المكان ده..مش مهم أوي يعني القهوة تكون ايطالي ..مش هازعل اكيد لو كانت قهوة فرنسي..المهم اصحى..فعلا المكان ده بقى هو اللي بيفتح بدري..دخلت وقررت أفوق وفضلت ليلو الصعيرة حبيبتي في عربيتها وانا عايشة مع فنجان القهوة الفرنسي والممزوج بالقرفه وصوص الشوكولاته ويطفو على سطحه ممجموعه من المكسرات المنتقاه بعناية..

طنط..طنط..ممكن ألعب مع البيبي ؟!! بصيت لاقيت طفلة جميلة جدا وشعرها كيرلي منثور على وجهها بتشاور على ليلو اللي باصه عليها من طرف القبعه وحاضنه روري ( روري ده دبدوب ليلو بتحبه وله حكاية هابقى احكيهلكم على روقان لوحدها)..بس لحظه كده..طنط ؟؟؟ أنا طنط ؟؟ ليه ؟!! ياااااه..أول مرة آخد بالي اني بقيت طنط عند بقيت الاطفال..هو انا كبرت أوي كده ؟!! ده انا اللي كنت بأقول طنط قريب أوي..

آه يا حبيبتي ممكن..بس هي لسه صغنونه تعالي هنا العبي معاها وهي في العربية..

اسمها ايه يا طنط ؟؟

تاني طنط (في سري) ؟!! اسمها ليلــو..

دي حلوة يا طنط أوي..

لاااااا دا انتي مستقصداني بقى (في سري برضه) .. مرسي حبيبتي انتي اللي أمورة أوي أوي..تعالي العبي معاها يللا..انتي اسمك ايه؟

أنا جودي..

الله يا جوجو..اسمك حلو أوي..تعالي يللا اجبلك عصير؟

ماشي يا طنط..

طنط برضه..بس خلاص بقى..هو أنا هاهرب من طنط على فين..ومسكت فنجان القهوة وسرحت بعيد أوي..أوي..هو أنا رايحه على فين كده ؟؟ وكأني باستوعب للمرة الأولى اني زوجة وأم وتخطيت الثلاثين من عمري..بس أنا لسه فاكرة الضفاير وكأنها كانت امبارح القريب أوي..فاكرة شنطة مدرستي وكتبي..فاكرة المريلة والبيت وأنا راجعه أجري..فاكرة مكتبي..فاكرة الكلية وفاكرة ضحكي مع اصحابي..فاكرة…

طنط..طنط..أنا هاقوم بقى

ياريت يا حبيبتي..قصدي..ماشي يا روحي..قولي باي للبيبي..

باااااااي

مشيت جودي وفضلت أنا كالعادة أفكر وأبص لليلو اللي سبحت في سبات عميق.. وسبحت انا في فكر أعمق..