زوجي العزيز الكلمه الحلوه صدقه
زوجي شعاره افعال لااقوال، عمره ما عرف يقول كلام حلو او رومانسي ومهما اقول له
“الست تشتريها بالكلمه الحلوه” ابدا لو بكلم كافر كان امن ،
ايه اللي حصل ؟ .. اقول لكم
بنتفرج علي فيلم رومانسي والجو هادي واقول له بدلع انت ليه ما بتقوليش كلام رومانسي
يقول اصل انا شعاري “افعال لا اقوال”طب هو ليه مش فاهم اني محتاجه اسمع كلام حلو
ما انا واحده ست ايه المشكله لو قال اي حاجه من الكلام بتاع ايام الخطوبه والرسايل اللي كانت بتنزل عليا كل 5 دقايق
يقول “مش ملاحظه اننا كبرنا “وطبعا الرد اللي لو قلته هيعكنن عليا لا انت اللي كبرت
اه من الهم اللي انتي وعيالك مشيلينه ليا اقول بدلع لا اللي في سننا لسه ما اتجوزوش يقول ليه عوانس
ويفتح صوته جاعوره محاضره عن حال البلد والاقتصاد والفلوس
يخرب بيت اليهود ياعم ده كلام ابن عم حديت وده ابدا
تاني يوم شفت فيلم “بنتين من مصر” فكرني بواحده صاحبتي هتموت وتتجوز
ومهما اقول لها “ما فتكيش كتير “متصدقنيش المهم الفيلم ده فيه جمله صعبه
اما “صبا مبارك “وعلي فكره الممثله دي وهميه بتقول : ياه ده اتاري احساس حلو اوي انك تلاقي حد بيهتم بيك ويخاف عليك ،
ليه الاحساس ده بعد الجواز بيضيع ؟
ليه ايام الخطوبه الاهتمام الوهمي والكرم الحاتمي في الهدايا والرسايل كل 5 دقايق؟
ماشي هموم الدنيا والحاله الماديه بتاثر علي الناس بس الكلام مش بفلوس
احنا برده بني ادمين شغلنا وشغل البيت والعيال وطلبات الباشا اللي مالهاش اخر كتير علينا
طب المكافاه تبقي كلمه حلوه ،المصيبه الاكبر ان اللي متجوزوش فاكرين الجواز كلام حلو و ورد وشموع ورومانسيه
و عشان كده قررت انا واصحابي ان البنت اللي تسالنا نقول لها الحقيقه المره
واللي يحصل يحصل تنصدم تنهار هي ونصيبها و بالذات موضوع الكلام الحلو
يلا يعني اللي اتجوزوا خدوا ايه وياريت هنعجب ده اول جمله بنبدا بيها الحديث عن مساؤي الجواز
وكل واحده مننا تحكي عن عيوب جوزها واهله وعاداته السيئه
وفي اخر الحديث اما نحس انها ابتدت تنهار نلم نفسنا ونقول لا بس مش كل الرجاله
ربنا يجعل حظك احسن من حظنا يلا حصل خير
