يومياتي مع حياتي (ليـلــو)21

انا لازم أعيد حساباتي مع نفسي..

الجملة الشهيرة التي أبدأ بها حربي مع ذاتي في محاولة لتقويمها..

أنا فعلا بحب ليلو او بعشقها كمان لكن ليلو نفسها مش هتحبني وأنا كده..

كده؟!! طيب هو ايه كده الأول؟

أيوة انا يومي أصبح يدور في فلك واحد فقط..ليلو وطلباتها ومراقبتها..مفيش أنا ومفيش هاني ومفيش الحياة المشتركة والاجتماعيه وفين الشغل وفين المستقبل..ايه ده ؟!! ده كمان مفيش مزاكرة ولا هوايات !! لا لا لا ..دي مش أنا..ومش هو ده اللي باتمناه لينا كلنا..طيب واضح كده يا أنا انك لازم تدخلي بشكل اجباري في برنامج تطوير الذات واعادة تأهيلها..

اتوكلنا على الله.. وهاناخده واحده واحده..الأول لازم ترجعي لذاتك وبعد كده نطورها..معلش الموضوع هاياخد شوية وقت ومجهود..

• ماما سومه لو سمحتي أنا هاسيب ليلو معاكي ساعتين بس هانزل الكوافير أعمل كام حاجه
• هاني أنا هاقابل صحبتي النهارده بقالي فترة ماخرجتش ولا عملت أي نشاط وصعب آخد ليلو معايا
• هاني في الكلية  في مراجعة معمولة فيها تجميعات مهمة اوي بس هاتقعد فترة طويلة من الساعة 8 الصبح لحد الساعه4 العصر..

طيب بس ده وقت طويل أوي.. وهتقدري تروحيها؟

ان شاء الله..يعني بمساعدتك ومساعدة ماما سومة تتزبط وده يوم واحد كمان..أمال لما انزل شغل هنعمل ايه؟

يارب بس تلاقي الأول وبعد كده نشوف..لاني مش عارف هنعمل ايه ساعتها..

وفعلا بدأت انزل وأرجع تدريجيا لنفسي مع عدم اهمال ليلو طبعا..بس لسه حاسه ان رجوعي بطئ مش بنفس كفاءتي السابقه..بس معلش صدقوني كله بالتدريج..المهم العزيمة..

أصبح جورنال الجمعه من الأشياء الرئيسية في حياتي..أبحث فيه بجدية عن وظيفة وكلي أمل أن أجد تلك الوظيفة المنشودة في مجالي..ويمر الاسبوع تلو الآخر ولكن دون جدوى..

كنت قد عقدت العزم على عدم الانتظار..فكل ما علي هو السعي وليس علي ادراك النجاح..فالتوفيق بيد الله..أما السعي فهو أمر واجب وحتمي سأسأل عنه..

كانت ليلو تتطور يوما بعد يوم..وبدأت علاقتها بيا وبباباها تطور جدا..خلاص بقت متعلقة بينا لدرجة كبيرة ويمكن مبالغ فيها, بس مااقدرش الومها..اصلها برج الجدي وده طبيعي جدا من البرج ده..بيمثل الأب والأم الاولوية الأولى له..يارب تكوني ذرية صالحة يا بنتي وتقر بك عيني..