- هاني فضيلي نفسك خالص بعد بكره..
- ليه؟
- يعني مجهزالك مفاجأة
- بجد ؟ ” وقد علت وجهه ابتسامته التي أعشق”
- أيوة بجد..هو يعني عشان بقى في ليلو ننسى نفسنا..
- خلاص طبعا
كان بالنسبة لي احساسي بان حبيبي وصديقي وزوجي ينتظر جلوسنا سويا كما اعتدنا احساس يدفعني للتجويد..
ممممم طيب..مستلزمات اليوم ده ايه يا رشا..في محاولة مني لعدم تجاوز شيء دون ترتيب :
- العشاء والذي يحتوي على الأكلة التي يفضلها هاني
- شموع وموسيقى هادئة
- طقم متأنق أرتديه ويكون لم يره منذ فترة طويلة ويستحسن ان لم يكن رآه من قبل
- فكرة مبتكرة لتقديم هذه الأشياء..ممممم..مثلا أحط يافطة على أول الريسبشن مكتوب عليها “مطعم الحب” وأحط منيو فيه الحاجات اللي أنا طابخاها وأجهز الشيك كمان في الآخر..
- ان ليلو تكون نايمة (ازاي بس؟؟ بجد ده أصعب ما في الموضوع)
ده معناه اني لازم أصحي ليلو من بدري ونبذل مجهود وفي نفس الوقت أكون بجهز العشا..طيب يللا بينا نبدأ..
انا هاعمل ستيك بالصوص البني ورز بسمتي وخضار سوتيه..وممكن أعمل كبد فراخ كنوع من المقبلات وسلطة زبادي..وأكيد عصير كوكتيل بدون سكر زي ما هاني بيحبه..يا مسهل..يللا نبدأ
مش ممكن أكيد مش ممكن الحظ ده..الأنبوبة تخلص النهارده..ياربي..أعمل ايه..هاني بجد انا متضايقة..عاوزة انبوبه حالا..الوقت اتأخر بجد وواؤايا حاجات كتيرة جدا عشان العشا..
طبعا كان التفكير انهكني وكل ما تتأخر الأنبوبه اتضايق أكتر..
اخييييراا..الانبوبة جت..يا سلاااام..
وبدأت المهمة الصعبة..لازم نلعب طول اليوم وماننامش يا ليلو عشان تنامي بعد اذان العشاء..دا أنا لسه وارايا حاجات كتيرة أوي..
كانت حبيبتي عاوزة بعربية ديزني بتاعتها..العربية دي كانت أول هدية في أول عيد ليلو تقضيه معانا..هاني فاجئنا بيها..وكانت مفاجئتي انه بجد ماكانش معاه فلوس يجيبها لأنه لو جابها كان مش هايعرف يجيب لنفسه حاجه جديدة يلبسها في العيد..والمفاجأة انه جابها..يومها أفتكر اني بكيت خلسه..انني أرى بعيني وأحس ما قد سمعته مرات ومرات من أهلي..(انتي هتبقي بتحسي انك ممكن تحرمي نفسك لكن ابنك أو بنتك لأ) ..
يا الله كم هي مشاعر راقية..اللهم أدمها على ابنتي واحفظها من الزوال..
