التجــــــربة
(حوار شعرى بين ابنة وامها )
– بنتى حبيبتى
اوعاك تعيشى التجربة
التجربة دى انا عشتها
عشت عذابها ومرها
ارجوك عنها ابعدى
— امى
سبينى اعيش التجــــــربة
يمكن انا .. اقدر انول فرحها
وادوق يا غالية حلوها
— خايفة عليك
– ياست الكل ماتخافيش
وعنى بنصايحك ما تبعديش
بس التجربة سبينى اعيش
— خايفة عليك
– ما تخافيش جيلنا واعى
جيلنا عارف ايه عيوبه
وايه ميزاته
– جيلكم متسرع مجنون
كل شئ عنده بيهون
ببساطة يحب وببساطة
ينسى الحب فى غمضة عين
— لأ يا حبيبتى العقل بيفرض نفسه
ما بقاش ينفع قيس يعيش تانى مجنون
او ورد يتجوز ليلى غصب عنها
او عنتر يتهان للون
احنا صحيح جيل مجنون
بس جنانا عين العقل
فاكرة ياأمى
جدتى قالت عنكم ايه
قالت برضك جيل مجنون
بس حنون
— خايفة عليك
— ياست الكل ما تخافيش
الدين والعلم ف ايدينا
الصوم والصلاة علمتينا
ونطيع ربنا فهمتينا
والعلم طور افكارنا
وانت كمان اللى طورتينا
ما تخافيش
عندنا عقل وعندنا دين
ومهما نكون يا حبيبتى مجانين
احيانا بنكون عاقلين
ما تخافيش
— بس يا بنتى
— ارجوك يا أمى
التجربة سبينى اعيشها
احاول اغير ملامحها
ياست الكل ما تخافيش
عندى الوعى وعندى الدين
ودعوات ست الحلوين
ما تخافيش
— خايفة عليك
ايوه بجد خايفة عليك
