مذكرات زوجة و قواعد لقيادة الرجال2
بداية قصتي مع زوجي كانت انه اتقدملي و ماما فاضلها حوالي 5 ايام و تسافر تحج سنة 2011
و هو كان مستعجل جدا على الرد و كل الناس برضو كانت شيفه ان عيب نركنة
لحد اما الشهر اللي ماما تسافرة للحج ده يخلص.
المهم اعد يزن عليا كل يوم انا و امي و ابن خالي اللي ربنا يسامحة اللي كان جاي من نحيتة.
المهم انا فكرا اليوم ده اوي مع اني مش بفتكر اي حاجة اصلا و خاصة لما تكون مش حاجة سعيدة.
كان يوم جمعة و انا لازم ارد علية علشان ماما كانت مسافرة السبت
و قد كان قررت اني اوافق و لعلة خير زي ما كله قال.
انا اعرف ان انتو اكيد خدتوا بالكوا من ان انا لحد دلوقتي لغيه شخصيتي تماما .
انا نفسي و انا بحكي دلوقتي متغاظه مني . بس و الله ربنا العالم الحالة النفسية اللي انا كنت فيها .
المهم وافقت و تاني يوم جه و وصل ماما معانا انا طبعا مش ركبه معاه انا ركبه انا و اخواتي في عربيتنا
و هو في عربيتة و اختي و جوزها في عربيتهم .
و بعد اما وصلنا ماما رجعنا البيت و بدأت الدنيا تتغير .
لقيت هجوم هائل عليا كل يوم من التليفون سواء من الارضي او الموبيل .
كل شوية مكالمة من حد من قرايبي بيشكرولي فية و يقولولي متفتريش و دي نعمة
و لو افتريتي هتزول من وشك و ربنا هيحرمك من النعم دي من تبترك عليها .
بقا هو كمان كل يوم يتصل بيا بعد 11 بالليل بحكم شغلة يقعد يرغي في اي حاجة و اي كلام
و كلام من اللي البنات بتقول علية حلو زي” وحشتيني , و بحب اسمع اسمي و انتي بتقولية و كلاااااام من ده”
و الله ما كنت ببقى مبسوطة بس كنت ببقى مستغربة و مكسوفة ان حد غريب بالسرعة دي بيقول كلام زي ده .
و استمر الحال لحد ما ماما رجعت من السفر و هنا جه وقت الجد و التغيرات من اتفاق بالكلام الى خطوبة و هنا بدأ التحول العظيم…. و يتبع
