متحسبوش يا بنات ان الجواز راحه ومتزعلوش يا بنات ان قولنا بصراحه ان الجواز عمره عمره ماكان راحه.
والله كان عندهم حق هههههههههه
كفايه هزار بقي ندخل فى الجد.
النهارده حابه اتكلم شويه عن موضوع الا وهو بيت ماما تلاقى البنت من دول واخده حريتها على الاخر فى بيت مامتها ولا بتعمل حاجه (ست هانم) وهاتى يا ماما وحطى يا ماما وماما شايله فى قلبها وساكنه.
(كنت خلفتك علشان اخدمك ولا تخدمينى ههههههه ) او لو ماما بقي بتخاف على بنتها ( ربنا يوعدك بحما تطلع عينك ) لا مش دى (والله انتى لو اتجوزتى فى بيت عيله هترجهى بيهم سخنين ) لا برضو مش دى ( ياروح قلب ماماربنا ينجحك يا قلبى ) ودول غالبا اما تكون بنت وحيده او انها فى كليه عليا طب او هندسه وساعات بتقلب لتربيه على حسب ما رايت (طبعا مش كل بنات طب او الكليات العليا انا بس بقول على اللى شوفته وياريتنى ماشوفته ).
وده قبل الزواج او مرحله الكليه نيجى بقي لمرحله سعيد الحظ لما يجى يسال على الكتكوته
لا انا بنتى مفيش منها اتنين (اه مهو مين يشهد للعروسه اكل ونوم وانتخه مفيش بعد كده ).
ويتجوز الحليوه بالكتكوته وطبعا فى الاول مفيش حاجه ولكن على راى عموره” كلهم بيقولوا كده فى الاول “.
ليه خصوصا فى بلاد الغربه رايت بنات خريجات جامعات مش بيهتموا ببيتهم يعنى لاقيت واحده بتقولى وانا مالى انا كنت دلوعه مامى عمرى معملت حاجه انا خريجه كليه كنت مهتمه بدراستى وبس؟ طب وهل ده مبرر انك بتدوقى الاكل بسنانك؟
متعرفيش ان مراكز الاحساس فى اللسان ؟
وهل ده مبرر انك تصحى جارتك فى عز حملها وتعبها علشان تدوقلك الاكل وهل ده مبرر انك تسيبى شقتك بالمنظر ده؟ منكرش ان شغل البيت محتاج مجهود وفيه مشقه بس ده مش مبرر نسيبه غير مرتب
معرفش هل ده دلع بنات ولا بيتهيالى
لقيت واحده تانيه بتقول انتى بتضيعى شبابك وجمالك على كلام فاضى انا اهم حاجه عندى جمالى؟ وهل ده مش من الجمال ان بيتى يكون جميل هل ده دلع بنات ولا بيتهيالى ؟
نفسي حد يرد عليا مين الصح ومين الغلط ؟ هل فعلا ده دلع بنات مش اكتر ولا اهمال؟ ياترى ده سببه الاهل ولا البنت نفسها وهل الزوج عليه عامل؟ هل فعلا اننا ندلع بناتنا ونهتم بدراستهم تنسيهم انهم ربات بيوت؟ وهل الزوج لا يتاثر بجمال منزله ام جمال زوجته وحده يكفى؟
ملحوظه: انا خريجه كليه عليا ولا اقصد الاهانه لاى من هذه الكليات ولكل قاعده شواذ ولكنى صدمت عندما رايت كثير من الامثله السيئه من كليات القمه وكنت اعتقد انهم قمه فى كل شئ.
