كتير مننا مبيقدرش ياخد خطوة التمرد علي حبيبه ، مع انه بيكون فعلا مش قادر يكمل ، لكن خلاص بحكم العاده مش قادر ياخد قرار التمرد ، ويخرج نفسه من حاله السيطره وكأنها سحر اسود ، او غيمة تقيله جدا بتلف حوالين عقل الواحد كل يوم اكتر من اللي قبله ، لكن ده بسبب بسيط اوي انك غير مستعد حاليا ، للتقدم فحياتك وانك تنسي الفتره اللي فاتت ، اول متيجي اللحظه الحاسمه ، هتتفاجئ جدا من افعالك اللي هتتقلب 360 درجه ، 
هتخرج من السيطره اللي كانت ربطاك بحبيبك بشوية تفاهات بسيطه ملهاش اي لازمه ومع ذلك حبيبك بيهتم بيها اكتر منك شخصيا ، هترمي كل صلة ربط بينك وبينه فلحظه صغيره جدا ، هتقرر انك تلبس لبس علي ذوقك انت ، وتعمل مظهر جديد انت بس اللي بتحبه ، هتحس برضا عن نفسك وعن شكلك ، هترجع لاصحابك القدام اللي هم صحابك انت بس مش صحاب مشتركين بينك وبين حبيبك ، هتحس بقيمة الهوا اللي بتتنفسه ، هتبدأ تعشق جسمك وتعشق نفسك ، هتتخلي عن كل روتين ممكن تقابله فحياتك ، هترمي كل حاجه ممكن تفكرك بموقف خلاف هو انتصر فيه مع انه معهوش الحق ، هتقرر ببساطه تخرج من الكائن العجيب اللي هو مش انت اللي هو حطك فيه وقفل بمفتاح ،
هتسمع كل الاغاني اللي بتحبها انت وبتخالف ذوقه ، هتحس ان كان في حبل مربوط بيه ايديك ورجليك واتفك ، او كأنه حجر فجيوبك متقلك ومش عارف تتحرك منه ،
هتبدأ تبص لمستقبلك المجهول وكأنه جنه ، هتحقق فيه كل احلامك ، هتبني بس مش هتهدم تاني ، هتلاقي حلم حياتك والشخص المناسب ، اللي مش هيحبسك جوا سجونه تاني ، هتصرخ من احساس الحريه ،
الكون كله هيكون ضيف عليك ، وانت اللي بتحدد مساره ، مسموحلك تتخيل حياتك زي ما انت عاوز مش مربوطه بحد تاني ،
التمرد لازم يكون ليه عواقب لان حبيبك هيرفض تماما انك تتخلي عن قيوده ، لانك كنت راضي ومن غير اي شكوي ، حتي اسلوب كلامه وروتينه معترضتش عليه بتاتا ، ودي بئه الحرب المضاده ليك ، لانه هيحس وكأنه اتهان ، انت اتخليت عنه ، عمره ما هيعترف انه هو اللي وصل الامور لكده ، هو اللي اتعامل معاك كانك ميداليه في جيبه ، واطمن لان كل ما هتضيع منه هيلاقيها ، وهيحطها فجيبه تاني ، وده دورك عشان تهزمه ، ببساطه انت انسان مش محتاج قفص ، ولا محتاج حبل وجنزير ، محتاج تكون راضي عن نفسك فكل لحظه محتاج تحب نفسك وحد يحبك زي ما أنت ….
